Arestado ang apat na suspek sa magkahiwalay na operasyon dahil sa pinaigting na Anti-Criminality Operation ng mga tauhan ng National Capital Region Police Office (NCRPO) nito lamang Martes, Oktubre 15, 2024.
Ayon kay Police Major General Sidney S Hernia, Acting Regional Director ng NCRPO, inaresto ng mga operatiba ng Quezon City Police District, ang isang suspek sa buy-bust operation bandang 1:50 ng madaling araw sa kahabaan ng Major Marcos Street, Barangay Pasong Tamo, Quezon City.
Nahuli ang suspek na kinilalang si alyas “Neptale” dahil sa pagbebenta ng hindi lisensyadong baril na isang .38 caliber revolver at mga bala.
Kasong paglabag sa Republic Act 10591 o mas kilala bilang “Comprehensive Firearms and Ammunition Regulation Act” ang kakaharapin ng suspek.
Samantala, tatlong suspek naman ang nadakip ng Caloocan City Police Station na kinilalang sina alyas “Dave”, “Jeff”, at “Merl” matapos ang insidente ng pamamaril sa Waling Waling Street, Barangay 187, Caloocan City.
Nagtamo ng mga tama ng bala ng baril ang biktima na isang 18 anyos na lalaki at kasalukuyang sumasailalim sa operasyon.
Nagsagawa agad ng follow-up operation ang mga suspek at narekober ang isang .38 caliber revolver.
Nahaharap ang mga suspek sa mga reklamong Frustrated Murder at paglabag sa Republic Act 10591 o mas kilala bilang “Comprehensive Firearms and Ammunition Regulation Act”.
Ang NCRPO ay patuloy pang palalakasin ang pagsisikap laban sa mga loose firearms at armadong grupo upang maging mapayapa at ligtas ang ating bansa.
Panulat ni PSSg Remelin M Gargantos
