Inaresto ng mga awtoridad ang anim na indibidwal dahil sa umano’y ilegal na pagbiyahe ng petroleum products sa Puerto Princesa City, Palawan noong ika-12 ng Hunyo 2024.
Nahuli ng pulisya ang mga suspek bandang alas 7:00 ng gabi na kinilalang sina alyas “Ronald”, 44; alyas “Rodel”, 50 at alyas “Roel”, 32, habang nagsasagawa ang mga tauhan ng Puerto Princesa City Police Station 5 ng checkpoint sa Barangay Tanabag, Puerto Princesa City.
Nakumpiska mula sa mga suspek ang isang Silver FUSO 10-wheeler truck na ginagamit bilang conveyance vehicle, at humigit-kumulang 4,400 litro ng diesel na may halagang Php261,360 sa merkado.
Ang mga nasabing produkto ay walang kaukulang mga dokumento at permit, dahilan upang sila’y arestuhin.
Samantala, bandang alas 10:25 ng gabi, ang mga tauhan ng Puerto Princesa City Police Station 4 ay naaresto naman sina alyas “Arcon”, 48; alyas “Michael”, 26 at alyas “Lennon”, 19, matapos mahuling may bitbit na petroleum products na walang mga permit o dokumento sa Aloha Farm, Purok Masagana, Barangay Macarascas, Puerto Princesa City.
Nakumpiska mula sa mga suspek ang isang Hyundai Wagon (Green) na may plate number KDL 235 na ginagamit bilang conveyance vehicle, at humigit-kumulang 600 litro ng petroleum products na may halagang Php20,000.
Ang mga produktong ito ay nakuha mula sa mga suspek nang walang mga kaukulang dokumento, na dahilan ng kanilang pagkakaaresto.
Ang mga naarestong suspek ay nasa kustodiya na ng pulisya habang naghihintay ng pagsasampa ng kaso para sa paglabag sa Presidential Decree No. 1865.
Ang matagumpay na operasyon ng mga awtoridad ay patunay ng kanilang dedikasyon sa pagpapanatili ng kaayusan at pagsugpo sa mga ilegal na gawain sa kanilang nasasakupan.
Ang ganitong klaseng operasyon ay nagbibigay ng mensahe sa publiko na ang batas ay umiiral at ang mga lumalabag dito ay haharap sa nararapat na parusa.
Source: Police Regional Office MIMAROPA
Panulat ni Pat Desiree Padilla
