Davao City – Dakong alas 10:20 ng gabi, Agosto 25, 2024, hindi bababa sa anim (6) na miyembro ng Philippine National Police (PNP) na kasama sa Civil Disturbance Management (CDM) team ang sugatan matapos silang sugurin ng isang miyembro ng Kingdom of Jesus Christ (KOJC) na kilala sa alyas “Gene”, na umatake sa kanila gamit ang mga bato at isang kitchen knife na tinatayang 12 pulgada ang haba.
Dagdag pa rito, dalawang indibidwal, na kilala bilang alyas “Mike” at “Gelo”, ang nahuli dahil sa pagtawid sa linya ng pulisya at pagbato sa CDM unit.
Kabilang sa mga sugat na tinamo ng mga opisyal ng PNP ay ang mga sugat sa ulo at likod ng leeg, mga gasgas sa pisngi at kanang paa, at sugat sa kaliwang kamay at sa kahabaan ng buto ng ilong na agad namang itinakbo sa Camp Sgt Quintin Merecido Hospital upang bigyan ng atensyong medical.
Samantala, bandang alas 12 ng umaga ngayong araw, August 26, 2024, nahuli ang isa pang indibidwal na kilala bilang si alyas “John”, at na-impound ang kanyang sasakyan matapos mahuli na naghahatid ng 18 pirasong secondhand tires at kerosene na balak umanong sunugin sa kanilang rally.
Matagumpay na nasunog ng mga miyembro ng KOJC ang mga secondhand na gulong at hinarang ang kalsada sa kahabaan ng National Highway sa harap ng KOJC compound.
Ganyunpaman, sa kabila nito, patuloy pa rin ang puwersa ng pulisya sa pagpapatupad ng maximum tolerance sa kabila ng pagiging agresibo at unruliness ng ilang miyembro ng KOJC alinsunod sa paalala ni Regional Director Police Brigadier General Nicolas D Torre III, upang mapayapang maisagawa ang operasyon.
