Nagpaabot ng tulong ang pulisya para sa mga pamilyang nasalanta ng Bagyong “Egay” sa pamamagitan ng “Adopt a Region Relief Operation” ng PRO3 to PRO2 sa apektadong bayan dulot ng bagyo sa Cagayan Valley nitong araw ng Linggo, Hulyo 30, 2023.
Ang team mula Police Regional Office 3 ay nagtungo sa Police Regional Office 2 sa pangunguna ni Police Lieutenant Colonel Ismael Gauna, Force Commander ng Bulacan 2nd Provincial Mobile Force Company sa inisyatibo ni Police Brigadier General Jose S Hidalgo Jr., Regional Director ng Police Regional Office 3, sa mga malubhang naapektuhan ng bagyong “Egay” sa Cagayan Valley.
Samantala, malugod naman na tinanggap ni Police Colonel Jimmy Garrido, Chief, Regional Operation Division ng Police Regional Office 2, ang mga naturang relief goods na naglalaman ng bigas, noodles, canned goods, bottle water at iba pang food items.
Sa datos ng Regional Community Affairs and Development Division (RCADD) ng Police Regional Office 2, ang mga pamilyang naapektuhan ng bagyo ay ang bayan ng Abulug, Allacapan, Pamplona, Aparri at Calayan, Cagayan kung saan may mga barangay ang lubog sa baha at may mga natrap ding mga kabahayan dahil sa biglaang pagtaas ng ilog sa Probinsya ng Cagayan sa tuloy tuloy na buhos ng ulan.
Lubos ang pasasalamat ni Police Brigadier General Percival Rumbaoa, Regional Director ng PRO2, sa lahat ng mga nagpaabot ng tulong particular na ang PRO3, stakeholders at iba pang ahensya ng gobyerno sa mga nasalanta ng Bagyong “Egay”.
Patuloy pa rin ang isinasagawang monitoring ng PRO2 sa mga apektadong pamilya dulot ng bagyong “Egay”.
Source: Police Regional Office 2
