Umarangkada sa pagbibigay tulong ang mga miyembro ng Alfonso Castañeda Police Station bilang bahagi ng kanilang Adopt a Family Program sa mga residente ng Barangay Lublub, Alfonso Castañeda, Nueva Vizcaya noong Setyembre 11, 2022.
Ang pamamahagi ng food packs ay kabilang sa kanilang programa na naglalayong maghatid ng tulong sa mga kababayang salat sa buhay.
Sinasabay ng mga kapulisan ng Alfonso Castañeda ang pamamahagi tuwing bumibisita sila sa mga liblib na Barangay at kapag sila ay nagpapatrolya.
Labis naman ang tuwa ng mga residenteng nakatanggap ng bigas, noodles at de lata sapagkat ito ay makakatulong bilang pagkain nila para sa ilang araw.
Pinuri naman ni Police Colonel Dante A Lubos, Officer-In-Charge ng Nueva Vizcaya Police Provincial Office, ang mga tauhan ng naturang istasyon na kanilang sinasalamin ang pagiging makatao at pagmamalasakit sa kapwa.
Source:Alfonso Castañeda PS
Panulat ni Police Corporal Carla Mae P Canapi
