Sto. Tomas City, Batangas (February 17, 2022) – Patay ang isang abogado matapos pagbabarilin ng dalawang armadong lalaki sa kanyang opisina sa Gov. Malvar Ave. Barangay Poblacion 1, Sto. Tomas City, Batangas noong February 17, 2022.
Nakilala ang biktima na si Reginald Michael C. Manito, 42 anyos, abogado at nakatira sa #063 General Miguel Malvar Avenue, Brgy. Poblacion 1, Sto. Tomas City, Batangas.
Ayon sa ulat, dalawang armadong lalaki na may dalang di matukoy na kalibre na baril ang pumasok sa opisina ng biktima at pinagbabaril sa ibat-ibang bahagi ng katawan. Naisugod pa sa St. Cabrini Medical Center, Sto Tomas City ang biktima ngunit dineklarang dead on arrival ayon kay Dr. Gil Christopher Auila.
Matapos ang insidente, mabilis na tumakas ang mga suspek patungo sa hindi malamang direksyon.
Samantala, narekober sa pinangyarihan ng krimen ang isang (1) piraso ng empty shell na galing sa hindi pa matukoy na kalibre ng baril.
Mabilis na nagsagawa ng manhunt operation ang mga tauhan ng Sto. Tomas Police Station laban sa mga suspek habang hindi pa nila matukoy ang motibo sa pamamaril.
Hinikayat ni Police Colonel Glicerio Cansilao, Provincial Director ng Batangas Provincial Police Office (PPO) ang sinumang may impormasyon sa kinaroroonan ng suspek na makipagtulungan at agad ipaalam sa mga otoridad para sa agarang ikalulutas ng kaso.
###
