Tabaco CPS, nagsagawa ng School Safety Lecture sa Baranghawon Elementary School

0
66

Nagsagawa ang mga tauhan ng Tabaco City Police Station (CPS) ng isang School Safety Lecture sa Baranghawon Elementary School noong Nobyembre 11, 2026, sa pakikipag-ugnayan sa Schools Division Office ng Tabaco City.

Ang aktibidad ay pinangasiwaan ni PLtCol Virgil B Bibat, Chief of Police ng Tabaco CPS, bilang bahagi ng patuloy na pagsusulong ng kapulisan sa ligtas at maayos na kapaligiran sa mga paaralan at pangangalaga sa kapakanan ng mga mag-aaral.

Layunin ng nasabing aktibidad na palawakin ang kaalaman at kamalayan ng mga guro, mag-aaral, at iba pang kawani ng paaralan hinggil sa kahalagahan ng kaligtasan sa loob ng paaralan, kahandaan sa oras ng sakuna at emerhensiya, gayundin ang wastong pagtugon sa mga posibleng banta at hindi inaasahang pangyayari na maaaring maglagay sa panganib sa kanilang buhay at seguridad.

Sa pamamagitan ng talakayan, itinuro ang kahalagahan ng pagiging mapagmatyag, pagkakaroon ng wastong kaalaman, at sama-samang pagkilos upang maiwasan ang anumang posibleng panganib. Nagsilbi rin itong pagkakataon upang higit pang patatagin ang ugnayan ng kapulisan at sektor ng edukasyon sa pagsusulong ng isang ligtas, maayos, at handang komunidad ng paaralan.

Muling pinagtitibay ng Tabaco CPS ang kanilang pangako na patuloy na makikiisa sa mga programang naglalayong pangalagaan ang mga mag-aaral at buong komunidad ng paaralan alinsunod sa adhikain ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.” Sa pamamagitan ng mga ganitong inisyatiba, isinusulong ng kapulisan ang isang ligtas na kapaligiran kung saan ang bawat mag-aaral ay makapagtuon ng pansin sa kanilang pag-aaral nang may kapanatagan at proteksyon.

Panulat ni PCpl Doxie Charesse C Casasos

Source: https://www.facebook.com/share/p/1DWFph19uP/

Leave a Reply