Lipa City, Batangas – Arestado ang apat na suspek dahil sa ilegal na tupada sa ikinasang operasyon ng Lipa City PNP nitong Huwebes, Mayo 5, 2022.
Kinilala ni Police Lieutenant Colonel Ronald Cayago, Chief of Police ng Lipa City Police Station ang apat na suspek na sina Dindo Riberta y Rico, 48, helper, residente ng Brgy. Banay-banay, Lipa City; Christian De Leon y Inaw, 36, driver, residente ng Purok 6, Brgy. San Guillermo, Lipa City; Arnel Latoza y Tenorio, 53, walang trabaho, residente ng Purok 6, Brgy. Mabini, Lipa City at Kevin Catmabay y Dimaano, 24, residente ng Purok 6, Brgy. Malagonlong, Lipa City.
Ayon kay PLtCol Cayago, bandang 12:40 ng hapon nahuli ang apat na suspek sa Brgy. Adya, Lipa City sa isinagawang operasyon laban sa ilegal na sugal ng mga operatiba ng Lipa City Police Station.
Nakuha sa apat na suspek ang apat na panabong na manok at walong tari ng manok.
Nahaharap naman ang mga suspek sa kasong Presidential Decree No. 499 o Cockfighting Law of 1974.
Ang Lipa PNP ay patuloy ang kampanya laban sa ilegal na sugal at nananawagan ng kooperasyon at suporta mula sa mga mamamayan para matigil ang mga ilegal na gawain sa kanilang nasasakupan.
Panulat ni Police Executive Master Sergeant Joe Peter Cabugon
