Metro Manila – Opisyal na inanunsyo ng Malacañang nitong Huwebes, ika-5 ng Mayo, ang paghalili ni Police Lieutenant General Vicente D. Danao Jr. bilang bagong Officer-in-Charge (OIC) ng Philippine National Police (PNP) kapalit ang kasalukuyang Chief, PNP na si Police General Dionardo B. Carlos na magreretiro sa darating na Mayo 8, 2022.
Kinumpirma naman ang pahayag ng Palasyo ng Kalihim ng Department of Interior and Local Government (DILG) na si Secretary Eduardo Año na kung saan sinabi niya na ang unang hakbangin bilang OIC ay ang siguraduhing nasa tamang lugar ang seguridad at mapakilos ang buong hanay ng kapulisan at manatiling alerto upang masiguro ang isang mapayapa, maayos at tapat na eleksyon sa bansa “[His] first order of the day is to ensure that all security preparations are in place and all police units are mobilized and on alert so that the country will have a peaceful, orderly and honest elections.”
Dagdag pa ni Sec. Año, bilang kasalukuyang commander ng National Security Task Force for 2022 National and Local Elections, naaangkop lamang ang kanyang pagkakatala bilang bagong OIC para masigurado ang isang ligtas at mapayapang botohan dahil kasama na ang heneral mula pa noong unang araw ng pagpaplano at paghahanda ng seguridad para sa nalalapit na eleksyon.
Naitalaga ang kasalukuyang Hepe ng Pambansang Pulisya na si PGen Dionardo B. Carlos sa kautusan ni Pangulong Rodrigo Roa Duterte noong Nobyembre 13, 2021 at magtatapos ang kanyang panunungkulan sa kanyang kaarawan sa darating na araw ng Linggo, ika-8 ng Mayo 2022, na siya ring pagpasok ng bagong pamunuan.
Sa pahayag naman ng Spokesperson ng PNP na si PBGen Roderick Augustus B. Alba, kampante ang PNP na kayang pangasiwaan ni PLtGen Vicente Danao Jr. ang organisasyon dahil sa kanyang track record at antas ng kakayahan.
Siniguro pa ni PBGen Alba na ano man ang nasimulan ni PNP Chief General Dionardo Carlos ay ipagpapatuloy ni PLtGen Danao Jr.
###
