Mas pinaigting ng mga tauhan ng Police Regional Office 10 (PRO10) ang seguridad at kaayusan kaugnay ng papalapit na “Undas 2026” sa iba’t ibang bahagi ng Northern Mindanao.
Ayon kay PBGen Nestor C Babagay Jr., Regional Director ng PRO10, isasailalim sa Full Alert Status ang lahat ng kapulisan sa Northern Mindanao at magtatalaga ng 7,206 na kapulisan at force multipliers mula Oktubre 31 hanggang Nobyembre 2, 2026, upang matiyak ang kaligtasan at seguridad ng publiko sa paggunita ng Araw ng mga Santo at Araw ng mga Kaluluwa sa ilalim ng programang Ligtas Undas 2026.
Kabilang sa mga itatalagang tauhan ang 4,044 mula sa Philippine National Police (PNP), 1,059 na tauhan mula sa iba pang mga yunit, at 2,103 na force multipliers, kabilang ang mga miyembro ng Barangay Peacekeeping Action Teams (BPATs), mga lokal na pamahalaan (LGUs), at mga traffic enforcers.
Nabatid na ipupuwesto ang mga tauhan sa mga sementeryo, memorial park, columbarium, mga lugar ng pagsamba, pangunahing lansangan, mga terminal ng transportasyon, mga pasyalan, at mga checkpoint. Bibigyan din ng partikular na pansin ang mga residential area upang maiwasan ang mga gawaing kriminal at matugunan ang mga posibleng banta sa seguridad.
“Our goal is to ensure that people can observe Undas safely and peacefully. We are positioning our personnel where they are most needed to prevent criminal activities, assist the public, and respond immediately to any security concerns” (Layunin naming matiyak na ligtas at mapayapang maipagdiwang ng publiko ang Undas. Ipinupuwesto namin ang aming mga tauhan sa mga lugar kung saan sila higit na kinakailangan upang maiwasan ang mga gawaing kriminal, matulungan ang publiko, at agad na makatugon sa anumang usaping may kinalaman sa seguridad), saad ni RD Babagay.
Samantala, inatasan din ni PBGen Babagay Jr., ang mga hepe ng mga yunit na tiyakin ang paglalagay ng mga tauhan at palakasin ang pakikipag-ugnayan sa mga opisyal ng barangay upang higit na mapahusay ang seguridad sa mga komunidad. Magtatatag din ng mga Police Assistance Desk (PAD) sa mga sementeryo at iba pang lugar na dinaragsa ng publiko upang magbigay ng tulong sa mga mamamayan.
Hinimok niya ang publiko na sundin ang mga pag-iingat sa kaligtasan sa pagbisita sa mga sementeryo, manatiling mapagmatyag, at sumunod sa mga paalala sa kaligtasan ng Ligtas Undas.
Ang mga hakbang na ito sa seguridad ay sumusuporta sa Focused Agenda ni Police General Jose Melencio C Naratatez Jr., Chief, PNP, na naaayon sa adhikain ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO 10-RPIO
