Camp Carlos Delgado, Catarman, Northern Samar – Nagkamit ng positibong resulta ang pagpapatupad ng 7-days Simultaneous Anti-Criminality and Law Enforcement (SACLEO) ng Northern Samar Police Provincial Office sa buong lalawigan kung saan naaresto ang 122 indibidwal na nahaharap sa magkakaibang kaso.
Ang tuloy-tuloy na pagsasagawa ng SACLEO sa iba’t ibang bayan sa buong lalawigan ay nakapagtala ng kabuuang 103 police operations na isinagawa mula Abril 25 hanggang Mayo 1, 2022.
Malaki ang nakuha ng NSPPO sa kanilang Manhunt Charlie Operations kung saan 43 katao ang naaresto sa bisa ng Warrant of Arrest. Pito sa kanila ay nauuri bilang most wanted sa antas ng munisipyo.
May kabuuang 27 indibidwal naman ang inaresto dahil sa pagkakasangkot sa ilegal na sugal at 7 sa illegal logging habang 14 na drug personalities ang boluntaryong sumuko sa panahon ng Tokhang.
Sa kabilang banda, ang mga operasyon ng ‘Oplan Katok’ ay nagbunga ng 22 baril na itinurn-over sa iba’t ibang istasyon ng pulisya para sa pag-iingat.
Lahat ng mga naarestong indibidwal ay dinala sa kani-kanilang mga arresting unit para sa tamang disposisyon at dokumentasyon.
Mensahe ni Police Colonel Alfredo Tadefa, Provincial Director ng NSPPO, “Ang SACLEO ay hindi lamang isang all-out na operasyon laban sa mga kriminalidad at ilegal na aktibidad ngunit bahagi rin ng pagpapalakas ng ating mga hakbang para sa isang ligtas na pagsasagawa ng 2022 Pambansa at Lokal na Halalan sa lalawigan”.
“Let us step up all our anti-criminality efforts para masigurado na walang election-related incident na mangyayari, at paigtingin din natin ang kampanya laban sa loose firearms para matiyak na hindi ito gagamitin sa karahasan sa panahon ng halalan,” dagdag pa niya.
Hinihikayat naman ng Northern Samar PNP ang patuloy na suporta at kooperasyon ng lahat ng mga Nortehanon upang maging mapayapa at ligtas ang botohan sa darating na Mayo 9, 2022.
###
Panulat ni Patrolwoman Rialyn B Valdez
