Umabot sa humigit-kumulang 100 gramo ng hinihinalang shabu na may Standard Drug Price (SDP) na Php680,000.00 ang narekober ng Police Regional Office 6 (PRO6) habang dalawang drug personalities ang naaresto sa pagpapatupad ng search warrant sa Iznart St., Brgy. President Roxas, Iloilo City, dakong alas 6:17 ng gabi noong Setyembre 16, 2026.
Kinilala ang naaresto na sina alyas “Madam” o “Tita Gilda,” 62 anyos, salon manager, at si alyas “Elma,” 56 anyos, salon staff, bilang mga drug personality at kapwa mga residente ng Iloilo City.
Isinagawa ang operasyon ng pinagsanib na puwersa ng Regional Police Drug Enforcement Unit 6 (RPDEU6), Regional Intelligence Unit 6 (RIU6), Regional Intelligence Division 6 (RID6), at Iloilo City Police Station 1 (ICPS1), sa bisa ng search warrant na inisyu noong Setyembre 9, 2026 ng Regional Trial Court, Branch 39, Iloilo City, kaugnay ng paglabag sa Republic Act No. 9165.
Nakumpiska mula sa mga suspek ang isang malaking heat-sealed transparent plastic sachet at 24 pang sachet na naglalaman ng hinihinalang shabu. Kabilang dito ang dalawang sachet na naitala sa constructive possession ng isa sa mga naaresto.
Kasalukuyang nasa kustodiya ng ICPS1 ang mga naaresto para sa kaukulang disposisyon at paghahain ng nararapat na mga kaso sa ilalim ng Republic Act No. 9165 o Comprehensive Dangerous Drugs Act of 2002.
Ayon kay PBGen Randulf T Tuaño, Regional Director ng PRO6, ipinapakita ng matagumpay na operasyon ang kahalagahan ng tuloy-tuloy na intelligence work, target validation, at koordinasyon sa pagpapatupad ng kampanya laban sa ilegal na droga.
“Sa bawat impormasyong ating pinahahalagahan, bawat target na ating sinusuri at kinukumpirma, at bawat operasyong isinasagawa nang naaayon sa batas, mas napapalapit tayo sa layunin nating mapanatiling ligtas ang ating mga komunidad. Hindi tayo titigil sa pagtukoy sa mga ugat ng ilegal na kalakalan ng droga. Patuloy nating gagamitin ang intelligence, koordinasyon, at tamang police action upang matukoy ang mga sangkot at mapanagot sila sa ilalim ng batas,” ani PBGen Tuaño.
Source: https://www.facebook.com/share/p/1EFFyPNJro/?mibextid=wwXIfr
