NAIA Terminal 2 — Arestado ang isang American Citizen pagkalapag nito sa NAIA Terminal 2 sa manhunt operation ng PNP Aviation Security Group dahil sa kasong paglabag sa RA 9995 o Anti-Photo and Video Voyeurism Act nitong Martes, May 3, 2022.
Kinilala ni Police Colonel Cesar Gerente, NCR Chief ng Aviation Security Unit ang suspek na si Jefferson San Miguel y De Vera, 35, American Citizen mula sa Los Angeles.
Ayon kay PCol Gerente, nahuli ang suspek bandang alas-5:40 ng umaga sa joint operation ng PNP AVSEG at Morong Municipal Police Station.
Ayon pa kay PCol Gerente, bigong magpakita ng Order of Release si San Miguel sa mga otoridad kaya’t agad syang dinampot at dinala sa station ng Morong, Rizal para sa kanyang kustodiya.
Dagdag pa ni PCol Gerente, naaresto si San Miguel sa bisa ng Warrant of Arrest sa kasong paglabag sa R.A. 9995 o Anti-Photo and Video Voyeurism Act na may rekomendadong piyansa na Php24,000.
Tiniyak naman ni PCol Gerente na walang mintis sa kanila ang mga lumabag sa batas na nagbabalak maglabas pasok sa ating bansa.
Source: AVSEU NCR
###
Panulat ni PCpl Jhoanna Marie Najera Delos Santos
