Pinalakas ng mga tauhan ng Tagum City Police Station ang information awareness activity para sa mga mag-aaral, guro, at kawani ng Ariesgado College Foundation, Brgy. Visayan Village, Tagum City, noong Agosto 24, 2026.
Pinangunahan ni PSSg Meluna C. Valera, PCR PNCO ng Tagum City Police Station, sa ilalim ng direktang pangangasiwa ni Police Lieutenant Colonel Edgardo G Bahan, Acting Chief of Police, ang pagbibigay ng impormasyon hinggil sa iba’t ibang anti-criminality measures at safety response na makatutulong sa pagpapanatili ng seguridad sa loob at paligid ng paaralan.
Tinalakay sa aktibidad ang mga praktikal na hakbang sa pag-iwas sa krimen, kahalagahan ng pagiging mapagmatyag, at mga paraan upang mapangalagaan ang sariling kaligtasan at ng mga taong nasa paligid. Binigyang-diin din ang kahalagahan ng maagap na pagkilala sa mga posibleng banta at responsableng pag-uulat sa mga awtoridad.
Nagbigay rin ng gabay ang kapulisan sa tamang pagtugon sa mga posibleng banta, emergency, at kriminal na insidente. Hinikayat ang mga mag-aaral, faculty, at staff na manatiling kalmado, alerto, at maayos na kumilos upang maiwasan ang panic at higit na maprotektahan ang kanilang sarili at ang buong komunidad ng paaralan.
Layunin ng aktibidad na mapalawak ang kaalaman at pag-unawa ng mga miyembro ng paaralan sa mga hakbang sa pag-iwas sa krimen, mapalakas ang kanilang pagiging mapagmatyag at personal na kaligtasan, at matiyak ang mahinahon, wasto, at epektibong pagtugon sa anumang potensyal na banta o emergency sa loob at paligid ng paaralan.
