Tambler, General Santos City – Matagumpay na naisagawa ang Duterte Legacy Caravan sa Police Regional Office 12, Headquarters, Tambler, General Santos City nito lamang Huwebes, Abril 28, 2022.
Ang nasabing programa ay pinangunahan ng Regional Director ng Police Regional Office 12 na si PBGen Alexander Tagum na siyang malugod na dinaluhan at sinuportahan ng Deputy Chief PNP for Administration, PLtGen Rhodel Sermonia na siyang focal person ng nasabing programa.
Dumalo rin sa naturang programa ang Executive Director ng Presidential Task Force on Media Security na si Usec Joel Egco, Dir Eduardo Marquez ng NICA 12, KKDAT Regional President Ryan Quinto, Former Deputy Secretary ng FSMR Noel “Efren” Legaspi at Director ng Police Community Affairs and Development Group, PBGen Eric Noble.
Katuwang din ang iba’t ibang ahensya ng pamahalaan maging ang mga Advocacy Support Groups at Force multipliers ng Rehiyon 12.
Ibinida sa nasabing programa ng ilan sa mga nagsalita ang matagumpay na mga nagawa at mga epektibong pamamaraan ng kasalukuyang administrasyon upang labanan at tugunan ang problema sa ilegal na droga at insurhensiya sa ating bansa.
Bukod dito, ang PRO 12 at iba pang PNP Regional Support Units kabilang ang mga kapatid na IPs ay naglatag ng kani-kanilang booth upang ipagmalaki ang iba’t ibang produkto at kultura sa kanilang lugar. Kasabay nito ang cultural dance na ipinakita ng bawat munisipalidad na dumalo.
Samantala, nagkaroon din ng libreng konsultasyon mula sa iba’t ibang ahensiya ng pamahalaan. Tumanggap naman ang bawat dumalo ng mga relief goods at foodpacks na lubos naman na ikinatuwa at ipinagpasalamat ng mga ito.
Ipinahayag naman ni PLtGen Sermonia ang kanyang taos-pusong pasasalamat para sa mainit na pagtanggap ng Rehiyon 12, maging sa solidong suporta na ipinakita ng ating mga kababayan at ang patuloy na pakikiisa sa pagpapanatili ng kapayapaan at kaayusan sa ating pamayanan.
Patunay na ang PNP ay patuloy sa pamimigay ng tapat at tunay na serbisyo para sa ikabubuti ng bawat Pilipino upang ipagpatuloy ang nasimulang programa ng kasalukuyang administrasyon.
###
Panulat ni Patrolman Gio Batungbacal
