Tinukoy ng Police Regional Office 3 ang 51 lungsod at bayan na Election Hotspots sa Rehiyong Tres noong Abril 27, 2022.
Ayon kay Police Brigadier General Matthew Baccay, Regional Director ng PRO3, 51 lungsod at bayan sa Central Luzon ang isinailalim sa Election Areas of Concern (EAC) at Election Areas of Immediate Concern (EAIC).
Ayon pa kay PBGen Baccay, ang mga lungsod at bayan na idineklara bilang hotspot areas sa ilalim ng yellow hanggang orange na kategorya: 32 ang nasa Nueva Ecija, 8 sa Bulacan, 3 sa Pampanga, 3 sa Zambales, 2 sa Bataan, 2 sa Tarlac at 1 sa Aurora.
Dagdag pa ni PBGen Baccay, tinukoy ng PNP ang mga hotspot ng halalan batay sa apat na kategorya — matinding tunggalian ng mga pulitiko, pagkakaroon ng insidente na may kaugnayan sa halalan, at presensya ng mga armadong grupo, gun for hire at mga komunistang teroristang grupo.
Ang EAC ay ang mga lugar na may matinding tunggalian sa pulitika at may presensya ng partisan armed groups at ang EAIC ay ang mga lugar kung saan malakas ang presensya ng mga rebeldeng komunista na sangkot sa karahasan na may kaugnayan sa halalan.
Ang PRO3 ay nagsimula na sa paghahanda para sa ligtas at tahimik na Halalan 2022 sa darating na May 9, 2022.
###
Panulat ni PCpl Jeselle V Rivera
