Davao City – Nagsagawa ng send-off ceremony para sa 70 tauhan ng Police Regional Office 11 na idedeploy bilang Protective Security Personnel (PSP) sa Camp Quintin Merecido, Buhangin, Davao City, nito lamang Biyernes, Abril 22, 2022.
Ayon kay PBGen Benjamin Silo, Jr., Regional Director, napili ang 70 tauhan na may angking galing at kasanayan sa pagganap sa nasabing tungkulin na binubuo ng 67 kalalakihan at 3 kababaihan.
Tungkulin ng PSP na magbigay ng seguridad sa mga indibidwal na nasa katungkulan o pampublikong opisina, karaniwan ang mga miyembro nito ay mula sa Police Security and Protection Group (PSPG).
Pinaalalahanan din ni PBGen Silo Jr. na sundin ang alituntunin ng kapulisan pagdating sa tamang gampanin ng lahat ng miyembro ng PNP sa halalan para maipatupad ang batayang patakarang ito ng gobyerno at panatilihin ang kanilang katapatan sa pamahalaan.
Ito ay bahagi lamang ng maigting at marangal na pagpapatupad ng PRO11 sa isang ligtas at mapayapang National and Local Elections 2022.
###
Panulat ni Patrolman Alfred Vergara
