Davao de Oro – Nasabat ng puwersa ng PNP ang matataas na kalibre ng baril at mga bala mula sa isang indibidwal sa bisa ng Search Warrant sa Purok Pinetree 2, Brgy. Poblacion, Maragusan, Davao de Oro, nito lamang Huwebes, Abril 21, 2022.
Kinilala ni PCpt Dexter James Melicor, Station Commander ng Maragusan MPS, ang suspek na si Bernard Gabule Ilag, 30, residente ng nasabing lugar.
Isinagawa ang nasabing operasyon ng mga tauhan ng 113 Special Action Company, 11 Special Action Battalion, PNP-SAF at Provincial Intelligence Unit sa ilalim ng pamumuno ni PLtCol Clifford John Nabor.
Ayon kay PCpt Melicor, nakuha sa suspek ang isang armalite, 47 basyo ng bala mula sa iba’t ibang uri ng baril, isang kalibre 45 pistol, pitong magazine ng iba pang uri ng baril, isang uzi, tatlong 12 gauge shotgun na bala, 12 live ammo ng .357 point pistol, limang live ammo ng 7.62, isang itim na sling bag at isang pulang weapon container bag.
Samantala, ang pagkadakip sa suspek at pagkumpiska ng mga matataas na kalibre ng baril ay produkto ng nagkakaisang pagsisikap ng Davao de Oro PNP sa pagpapaigting ng anti-criminality efforts at kampanya laban sa loose firearms kabilang na ang pagpapatupad ng nationwide gun ban bilang paghahanda sa pagsasagawa ng ligtas, mapayapa, at maayos na Mayo 2022 National and Local Elections.
###
Panulat ni Patrolman Alfred Vergara
