Sisimulan ng Negros Occidental Police Provincial Office (NOCPPO) ang pagpapakalat ng mga tauhan ng pulisya sampung araw bago ang pambansa at lokal na halalan sa Mayo 9.
Ipinahayag nitong araw, Abril 22, 2022 ni Police Lieutenant Abegael Donasco, NOCPPO spokesperson na handa na rin sila sa pamamahagi ng mga election-related materials na dadalhin sa hilaga at timog na bahagi ng lalawigan.
Ayon kay PLt Donasco, ang NOCPPO ay hindi na hihingi ng karagdagang manpower mula sa ibang mga lalawigan, bilang bahagi ng mga protocol upang matiyak na walang bagong variant ng COVID-19 ang papasok sa Negros Occidental.
Idinagdag niya na sa anim na City at Police Provincial Offices sa Western Visayas, ang NOCPPO lamang ang nakapag-ulat ng zero COVID-19 variants.
Halos 1,400 pulis sa ilalim ng NOCPPO ang itatalaga sa pagbabantay sa mga voting center sa panahon ng halalan.
Dalawang pulis ang ipapakalat sa bawat isa sa 698 voting centers sa lalawigan, habang ang iba ay itatalaga sa City o Municipal Election Monitoring and Action Centers, o bilang bahagi ng Quick Reaction Force ng NOCPPO sakaling magkaroon ng seryosong insidente.
###
