Valenzuela City — Arestado ang isang lalake sa entrapment operation ng Valenzuela PNP dahil sa pinadeliver na marijuana (kush) sa isang Angkas Rider nito lamang Linggo, Abril 17, 2022.
Kinilala ni Police Colonel Ramchrisen Haveria Jr, Chief of Police ng Valenzuela City Police Station ang suspek na si Aaron James Bolivar y Condez, 29, residente ng Barangay Paso De Blas, Valenzuela City.
Ayon Kay PCol Haveria Jr, bandang 11:30 ng gabi naaresto ang suspek sa kahabaan ng Francisco St., Paso De Blas, Lungsod ng Valenzuela ng mga operatiba ng Station Drug Enforcement Unit ng Valenzuela CPS.
Ayon pa kay PCol Haveria Jr, bago nahuli ang suspek, personal na nagtungo sa kanilang tanggapan ang isang rider ng Angkas at nireport sa kanila na ang kanyang mga delivery goods na kinuha mula sa Sampaloc, Manila ay diumano naglalaman ng hinihinalang marijuana (Kush) na ihahatid sa suspek sa Paso De Blas, Lungsod ng Valenzuela.
Pagkatapos maberipika ang salaysay ng rider agad nagkasa ng entrapment ang mga otoridad at nakumpiska kay Bolivar ang limang heat-sealed transparent plastic sachet na naglalaman ng pinaghihinalang marijuana (Kush) na humigit-kumulang limang gramo at tinatayang nagkakahalaga ng Php10,000.
Nasamsam din mula sa suspek ang isang brown paper bag, isang self-sealed paper bag na naglalaman ng cookies, isang Php20, dalawang smartphone (Realme at Huawei), isang puting maikling rubber string, at Php100 at Php50 na binayad bilang delivery fee.
Mahaharap si Bolivar sa kasong paglabag sa Sec 11 Art II ng RA 9165 o Comprehensive Dangerous Drugs Act of 2002.
Tiniyak ni PCol Haveria Jr na walang lusot sa PNP ang ganitong modus ng mga sangkot sa ilegal na droga.
Source: NPD PIO
###
Panulat ni PSSg Remelin Gargantos
