Kasunod ng pag-recall sa may 16,820 Uniformed Personnel ng Philippine National Police na sumasailalim sa Mandatory Career Courses and Field Training Program na idedeploy para sa “2022 National and Local Elections (NLE)”, mayroon naman na 1,160 miyembro ng PNP-NHQ Reactionary Standby Support Force (RSSF) ang nagsimula na rin ang Apat na Linggong pagsasanay bilang isa sa paghahandang-pangseguridad ng Pambansang Pulisya para sa darating na halalan sa susunod na buwan.
Ang pagbubukas ng seremonya ng 2022 NLE Training for RSSF Members ay ginanap noong Biyernes (Abril 8) sa PNP Transformation Oval, Camp Crame, Quezon City na pinangunahan naman ni PLtGen Ferdinand O Divina, kasalukuyang Deputy Chief PNP for Operations (TDCO) at siya rin ang tumatayong Commander Security Task Force for 2022 National and Local Elections.
Ayon kay PLtGen Divina, bilang isa sa mga deputized law enforcement agencies ng Commission on Elections (COMELEC), marapat lamang anya na ating gampanan ang isang mahalagang papel para sa 2022 NLE, kung kaya’t ang nasabing pagsasanay ay kinakailangan upang suriin o ma-i-update ang kaalaman ng ating mga pulis sa mga umiiral na regulasyon, batas, at mekanismo upang mapangalagaan ang proseso ng halalan na may layuning tiyakin ang isang mapayapang halalan na walang halong pandaraya pati na rin ang pagpapanumbalik ng tiwala at kredibilidad sa proseso ng elektoral.
Paalala pa ni PLtGen Divina sa lahat ng ating mga pulis, isagawa anya ang mga tungkulin sa halalan at alalahanin ang mga pangunahing obligasyon ng bawat pulis na manatiling apolitical at laging magbigay ng propesyonal, mabilis, mahusay, at magalang na pagtugon sa isang lehitimong kahilingan ng mamamayan para sa serbisyong dekalidad. Hinihikayat din niya ang ating mga pulis na na seryosohin ang nasabing pagsasanay na ito dahil tiyak na ito ay gaganap ng malaking papel sa ating sinumpaang pananagutan sa pagpapatuloy ng isang mapayapa, tapat, at patas na Pambansa at Lokal na Halalan. (With reports from PCpl Nechaell Carmie Hadjula, PNP PIO).
