Taal, Batangas – Nakauwi na ang mga evacuees ng pagsabog ng Bulkang Taal sa tulong ng Batangas PNP bandang 10:00 ng umaga nitong Sabado, Abril 9, 2022.
Ayon kay Police Colonel Glicerio Cansilao, Provincial Director ng Batangas Police Provincial Office, ibinaba na ng Department of Science and Technology-Philippine Institute of Vulcanology and Seismology mula sa Alert Level 3 patungong Alert Level 2 ang kalagayan ng Bulkang Taal.
Bumaba ang bilang ng volcanic earthquakes, paghina ng pagsingaw ng volcanic gas at marahang pag-impis ng bulkan.
Ayon pa kay Police Colonel Cansilao, nagbigay seguridad at tulong ang Batangas PNP katulong ang iba pang mga ahensya sa mga pamilya na naapektuhan ng pagsabog ng Bulkang Taal.
Tinatayang nasa 1,175 pamilya o 4,036 na mga residente sa mga bayan ng Agoncillo at Laurel, Batangas ang pinayagan ng makabalik sa kani-kaniyang tahanan.
“Lubos po ang ating pasasalamat sa Poong Maykapal sa paghina ng pag-aalburoto ng Bulkang Taal. Ipinapaalala po muli natin na bagama’t bumaba na sa Alert Level 2 ang bulkan ay patuloy po tayong maging mapagmatyag at laging handa. Sumunod pa rin po tayo sa mga abiso at alituntunin ng mga awtoridad upang matiyak ang kaligtasan ng lahat”, ani Police Brigadier General Antonio Yarra, Regional Director 4A.
Source: piobatangasppo
###
Panulat ni Police Executive Master Sergeant Joe Peter Cabugon
