Paranaque City — Arestado ang isang Chinese National ng Parañaque PNP matapos hindi bayaran ang Php400,000 na inutang nitong Lunes, Abril 11, 2022.
Kinilala ni District Director Police Brigadier General Jimili Macaraeg ang suspek na si Zhang Yujun, 27 at POGO (Philippine Offshore Gaming Operators) worker.
Ayon kay PBGen Macaraeg, bandang 3:55 ng madaling araw nahuli ang suspek sa harap ng NUWAH Hotel, City of Dreams, Aseana Avenue, Barangay Tambo, Parañaque City.
Batay sa ulat, habang nasa loob ng City of Dreams ang suspek at ang biktima nito na si Wang Longqiang, 23, Chinese national at isa ring POGO worker, nanghiram umano ng Php400,000 ang suspek sa kanya at nangako na ibabalik at babayaran ito matapos maglaro sa loob ng casino.
Ngunit umalis si Yujun sa lugar nang walang binalik na pera sa biktima.
Kaya humingi na ito ng tulong sa mga security personnel ng City of Dreams at naharang ang suspek sa labas ng NUWAH Hotel.
Dahil matindi na ang tensyon sa magkabilang panig humingi na ng saklolo ang biktima sa mga tauhan ng Tambo Police Sub Station.
Dito na dinala sa presinto ang suspek at sinampahan ng Estafa, at Alarms and Scandal.
“Ang gawaing ito ay hindi kukunsintihin dito sa ating bansa, lahat ng lumalabag sa batas ay huhulihin anuman ang nasyonalidad” saad ni PBGen Macaraeg.
Source: SPD PIO
###
Panulat ni PSSg Remelin Gargantos
