Arestado sa magkahiwalay na operasyon ang dalawang miyembro ng Communist Party of the Philippines-New People’s Army (CPP-NPA) sa pinagsanib puwersa ng militar at PNP sa Himamaylan City, Negros Occidental nito lamang Huwebes, Abril 7, 2022.
Kinilala ng Philippine Army’s 94th Infantry Battalion (IB) ang mga naarestong suspek na si Jayson John Gazon, 30, residente ng Purok 2, Barangay San Antonio at Kenneth Nabong, 31, residente ng Sitio Uwakan, Barangay Buenavista, Himamaylan City, Negros Occidental.
Ang dalawang suspek ay nagsilbing courier ng Sentro de Grabidad Platoon ng Central Negros Front 2 ng NPA at may Warrant of Arrest para sa kasong pagpatay.
Ayon kay Lt. Col. Van Donald Almonte, Commander ng 94IB, natagpuan ng mga puwersa ng gobyerno sina Gazon at Nabong batay sa impormasyong ibinigay ng mga residente, na nag-udyok sa Himamaylan City Police Station na kumilos ng mabilis upang mahuli ang dalawang suspek.
“Kami ay nagpapasalamat sa napapanahon at tumpak na impormasyon mula sa mga residente. Pinupuri din namin ang Himamaylan City Police Station sa kanilang mabilis na kooperasyon at koordinasyon,” ani Lt. Col. Almonte.
Sinabi ni Lt. Col. Almonte na walang lugar ang CPP-NPA sa gitnang Negros, at ang pinakaligtas na pagpipilian para sa mga rebeldeng komunista ay ang sumuko.
Ang PNP ay aktibong nakikipag-ugnayan sa militar at handang tumulong upang makamit ang malawakan at pangmatagalang kapayapaan sa bansa upang matuldukan ang problema sa insurhensiya.
Source: pna.gov.ph
Panulat ni Police Master Sergeant Leah Lyn Q Valero
