Inilibing na ang labi ng namatay na hinihinalang kasapi ng New People’s Army na si alyas “Fredo”, 19 taong gulang, umaga ng ika-12 ng Oktubre, 2021 sa Sitio Kailawan, Brgy. Sto. Niño, Talaingod, Davao del Norte sa tulong ng Revitalized-Pulis sa Barangay kasama ang 56th Infantry Battalion ng Philippine Army.
Tinulungan ng mga tauhan ng RMFB 11 R-PSB sa pamumuno ni PLt Gerald Lopez ang pamilya nito na mabigyan ng maayos na burol at libing si alyas “Fredo” tanda ng kanilang sinserong pakikiramay sa pagkamatay nito.
Si alyas “Fredo” ay nasawi sa naganap na engkwentro ng AFP partikular na ang 56th Infantry Battalion sa ilalim ng 1003rd Infantry Brigade ng 10th Infantry Division kontra NPA sa Sitio Cabadiangan Brgy. Sto. Niño, Talaingod, Davao del Norte noong Oktubre 6, 2021.
Nakuha mula rito ang isang (1) armas, sampung (10) magazine na may mga bala, isang (1) improvised explosive device, hand grenade, solar panel, tatlong (3) backpack na may mga personal na gamit, mga pagkain at medical supplies, at mga subversive document.
Maging sa kabilang buhay, pulis ang naging karamay ng pamilya ng nasawi kung saan pinatunayan ng RMFB 11 R-PSB na hindi pinipili ng pulisya ang kanilang tinutulungan maging ito man ay mula sa pagkakalinlang ng makakaliwang grupo. Patuloy din sila sa pagsasagawa ng iba’t ibang programa sa ilalim ng EO 70 NTF-ELCAC (National Task Force to End Local Communist Armed Conflict).
#####
Article by Police Corporal Mary Metche A Moraera
