Bacolod City – Patay ang isang driver ng motorsiklo at sugatan naman ang kasama nito ng pagbabarilin ng riding in tandem bandang 9:00 ng umaga ng Biyernes, Marso 11, 2022 sa Alijis-Murcia Road, sa harap ng Green Acres Subd. Brgy. Mansilingan, Bacolod City, Negros Occidental.
Ayon kay Police Captain Elmer Bonilla, Hepe ng Bacolod City Police Station 7, tinamaan sa likod ang biktima na si Johnny Tamundong, 33, residente ng Barangay Buenavista, Murcia, Negros Occidental na naging sanhi ng kanyang pagkamatay.
Samantala, patuloy namang ginagamot sa hospital ang kanyang kasama na si Elias Baal, 29, na parehong taga Brgy. Buenavista sa bayan ng Murcia.
Dagdag pa ni Police Captain Bonilla, nakatanggap daw ng mga death threats ang biktima base sa salaysay ng asawa ni Tamundong.
Papunta sana ang mga biktima sa pinagtatrabahuan nilang cargo company ng bigla silang pinagbabaril ng mga suspek sakay ng motorsiklo na agad namang tumakas patungong Brgy. Mansilingan Proper.
Narekober naman sa crime scene ang dalawang basyo ng cal. 9mm at ang motorsiklo ng mga biktima.
Ang kapulisan ay nagsasagawa na ng imbestigasyon at tinitingnan kung problema sa trabaho ang maaaring dahilan at motibo sa pamamaril.
###
Panulat ni Patrolman Kher D Bargamento
