Lubos ang tuwa ng isang security guard matapos handugan ng bagong sapatos ng pulis sa Balamban, Cebu nito lamang umaga ng Miyerkules, Marso 9, 2022.
Kinilala ang mabait at mapagbigay na pulis na si PSMS Godofredo Dumdum na mas kilala sa ngalang “Pablis” na kasalukuyang nakatalaga sa Balamban Municipal Police Station.
Umaga nang Martes ng sumilong si PSMS Dumdum sa Palawan Pawnshop nang hindi inaasahan ay napansin nito ang luma at butas na sapatos ng security guard na noo’y naka-duty na si SG Jomarie Ondoy.
Sa kanyang nakita, ramdam ng pulis ang hirap na pinagdadaanan ng security guard dahil minsan ay naranasan na rin niya ito.
Kaya naman, makalipas ang isang araw binalikan nito ang security guard bitbit ang bagong sapatos at kanyang ipinagkaloob ito kay SG Ondoy.
Base sa pahayag ng Balamban Municipal Police Station sa kanilang Facebook post, inilarawan si PSMS Dumdum bilang isang responsible at maaasahang kasamahan at lubos na hinahangaan sa kanyang pagiging mabuting pulis.
Nawa’y ang kabutihan na ipinamalas ni PSMS Godofredo Dumdum ay pamarisan ng karamihan.
###
Panulat ni Patrolman Carl Philip Galido
