Nakiisa ang buong hanay ng Philippine National Police (PNP) sa pagdiriwang ng buong bansa sa ika-127 taong anibersaryo ng Araw ng Kalayaan ng Pilipinas ngayong Hunyo 12, 2025.
Sa ginanap na seremonya sa paggunita ng Araw ng Kasarinlan na pinangunahan mismo ni President Ferdinand R. Marcos Jr., nakiisa si Police General Nicolas D. Torre III, PNP Chief, kasama ang iba pang mga matataas na opisyal ng pamahalaan nito lamang umaga sa Rizal Park, Manila City.
Ang taunang pagdiriwang na may temang: “Kalayaan, Kinabukasan, Kasaysayan” ay nakasentro sa hindi matumbasang katapangan ng lahat ng ating mga ninuno na nakaukit sa makulay na kasaysayan ng bansa. Sumasalamin din ang araw na ito sa lahat ng mga nagbuwis ng buhay upang ipaglaban ang kasarinlan ng ating minamahal na inang bayan.
Sa National Headquarters, nagsagawa rin ng simpleng seremonya sa pamamagitan ng isang symbolic Flag Raising Ceremony na dinaluhan naman ng mga miyembro ng PNP National Headquarters-Reactionary Standby Support Force (NHQ-RSSF).
Habang nagdiriwang ang buong Pilipinas sa araw na ito, patuloy namang sinisiguro ng buong Pambansang Pulisya ang pagpapanatili ng kapayapaan at kaayusan sa lahat ng mga lansangan sa pamamagitan ng mas pinaigting na police visibility partikular na sa mga pangunahing lungsod sa bansa.
