Timbog ang isang 24 taong gulang na lalake sa isinagawang entrapment operation ng Quezon City District Anti-Cybercrime Team (QCDACT) matapos mahuling nagbebenta ng kaniyang bank account online sa halagang Php2,500.
Ayon kay Police Lieutenant Colonel Crisostomo Ubac, Chief ng QCDACT, naaresto ang suspek sa harap ng isang bangko sa Barangay Bago Bantay, Quezon City kasunod ng kanilang matagumpay na cyber-patrolling operation.
“Na-monitor natin sa tinatawag nating cyberpatrolling. Kung mayroong pagpapatrolya sa kalsada, mayroon din tayong ginagawa sa cyberspace. So open naman po itong mga activities na ito, pina-publicize nila for sale ganito,” saad ni PLtCol Ubac.
Dagdag pa niya na ginamit ng suspek ang kaniyang social media para magbenta ng kaniyang bank account na naagapan ng QCDACT cyber patrollers. Matapos makumpirma ang naturang pagbebenta, nakipagtransaksyon ang mga awtoridad sa suspek na siyang naging dahilan ng pagkahuli nito.
“Habang nagsa-cyber patrolling ang tropa natin—cyber patrollers natin—namonitor ito. Nagbebenta siya ng bank account niya, so in-engage natin ito. Then we come up sa meet-up and then, well, chineck natin na sa kanya nga at active pa ang bank account na ito,” paliwanag ni PLtCol Ubac.
Samantala, binigyang paalala naman ng mga awtoridad ang publiko na ilegal ang pagbebenta ng kanilang mga sariling bank accounts.
“Bawal po ang magbenta ng ating personal bank accounts, bawal po ipagamit, ipahiram at bawal din po bumili. Dahil ang mga bank accounts na iyan ay personal transactions po natin, at hindi puwede gamitin ng ibang tao,” saad ni PLtCol Ubac.
Nahaharap ang naarestong suspek sa kasong paglabag sa Section 5 (d) ng Republic Act 12010 o ang “Anti-Financial Account Scamming Act”, na may kaugnayan sa Section 6 ng Republic Act 10175, o ang “Cybercrime Prevention Act of 2012”.
Photo Courtesy: ACG FB Page
Source: ABS CBN
