Naaresto ng Bacolod City PNP ang tatlong indibidwal at nakumpiska ang tinatayang 4.6 kilo ng hinihinalang shabu na nagkakahalaga ng tinatayang Php31.28 milyong pesos sa magkakahiwalay na buy-bust operations nito lamang Linggo, ika-18 ng Mayo, 2025.
Ayon kay Police Colonel Joeresty P Coronica, City Director ng Bacolod City Police Office (BCPO), sinamantala umano ng mga sindikato ng droga ang pagkaabala ng mga pulis sa election-related duties upang makapagpasok ng malalaking bulto ng iligal na droga.
Unang isinagawa ang operasyon ng mga operatiba sa isang bahay sa Country Homes Subdivision, Barangay Estefania, kung saan naaresto ang suspek na kinilala sa alyas na “Jom” o “Drake” at narekober ang 2.5 kilo ng suspected shabu na nagkakahalaga ng Php17 milyong pesos.
Sinundan ito ng ikalawang operasyon ganap sa loob ng isang silid ng Jade Court 2 motel sa Barangay Singcang-Airport, Bacolod City kung saan nahuli si alyas “Cherry,” 41 anyos, residente ng Jaro, Iloilo City, na nakuhaan ng 1.1 kilo ng pinaghihinalaang shabu na tinatayang Php7.48 milyon pesos ang halaga.
Sa pangatlong operasyon naman na isinagawa sa Purok Lampirong, Barangay 2, Bacolod City ay nadakip si alyas “Robert” at nakumpiska ang isang (1) kilo ng suspected shabu na may halagang tinatayang Php6.8 milyon pesos.
Dagdag pa ni PCol Coronica, ang mga nasabing iligal na droga ay nagmumula sa mga supplier na nasa Luzon at dumadaan sa Panay Island at Cebu bago makarating sa Negros.
Muling tiniyak ng Bacolod City Police Office ang kanilang dedikasyon sa mas pinaigting na kampanya laban sa iligal na droga upang mapanatili ang kapayapaan at kaligtasan ng komunidad, isang patunay ng matatag na pangangalaga ng Philippine National Police sa kapakanan ng mamamayan.
Source: INQUIRER NET
Panulat ni Pat Justine Mae Jallrores
