Arestado ang dalawang drug suspek sa isang buy-bust operation ng pulisya na isinagawa sa Barangay Puruganan, Dingras, Ilocos Norte bandang alas-4:22 ng hapon nitong Mayo 18, 2025.
Kinilala ang mga suspek na sina alyas “Mark” , 37 anyos, binata, isang driver at Top 10 Regional High Value Individual (HVI), residente ng Barangay Puruganan, Dingras, at alyas “Benjo”, 27 anyos, may live-in partner, driver at residente ng Barangay Peralta, Dingras.
Ayon kay Police Captain Cristopher U Pola, Action Officer ng PPDEU Ilocos Norte, ikinasa ang buy-bust operation ng pinagsanib na puwersa ng Provincial Police Drug Enforcement Unit (PPDEU) at Provincial Intelligence Unit (PIU) bilang lead units, kasama ang mga tauhan mula sa Regional Intelligence Division (RID), Dingras Municipal Police Station (MPS), Nueva Era MPS, at Philippine Drug Enforcement Agency – Ilocos Norte Provincial Office (PDEA-INPO).
Nahuli ang dalawang suspek matapos silang magkasabwat na ibenta ang isang heat-sealed plastic sachet na naglalaman ng hinihinalang shabu sa isang police poseur-buyer.
Nakumpiska rin mula sa posesyon ni alyas “Mark” ang anim (6) na heat-sealed transparent plastic sachets na naglalaman ng puting kristal na substansiya; isang (1) tunay na Php1,000 bill na may serial number SC453133 at limang (5) pirasong pekeng Php1,000 bill na ginamit bilang buy-bust money; isang (1) brown coin purse; at isang (1) Vivo android phone.
Samantalang mula naman sa posisyon ni alyas “Benjo” ay narekober ang Dalawang (2) heat-sealed transparent plastic sachets na naglalaman ng hinihinalang shabu; isang (1) improvised glass tooter; isang (1) red coin purse; isang (1) lighter; isang (1) black at blue backpack; isang (1) motorsiklong kulay itim na Kawasaki Rouser na may plakang AA43895; at Php189 personal na pera.
Ang mga nasamsam na ebidensya ay isinailalim sa dokumentasyon at tamang imbentaryo sa presensya ng mga saksi, samantalang ang mga suspek ay kasalukuyang nasa kustodiya ng PNP para sa karampatang kaso sa paglabag sa Republic Act 9165 o ang “Comprehensive Dangerous Drugs Act of 2002”.
Patuloy ang kampanya ng pulisya laban sa iligal na droga sa rehiyon bilang bahagi ng pangakong kapayapaan at kaayusan sa komunidad.
Source: Dingras MPS/ PPDEU INorte
Panulat ni PMSg Carmela G Danguecan
