Himas rehas ang tatlong (3) High Value Target (HVT) matapos masabat ang tinatayang 30 kilo ng hinihinalang shabu na nagkakahalaga ng Php204 milyon sa isinagawang buy-bust operation ng mga awtoridad sa Payogi Leisure Hub, Old Barrio Road, Barangay Minuyan, Norzagaray, Bulacan nito lamang Huwebes, ika-15 ng Mayo 2025.
Pinangunahan ng Philippine Drug Enforcement Agency (PDEA) Special Enforcement Service (SES), sa pamumuno ni IAI Bobby Marcelino, Team Leader, PDEA Regional Office lIlI, San Jose del Monte City Police Station, at Norzagaray Municipal Police Station sa ilalim ng pamumuno ni Police Brigadier General Jean S Fajardo, Regional Director ng Police Regional Office 3.
Kinilala ang mga naarestong suspek na sina alyas “Jessie”, 44 anyos, construction worker mula sa Cavite; alyas “Tina”, 36 anyos, residente ng Quezon City; at alyas “Jess”, 21 anyos, mula rin sa Cavite.
Nasamsam sa mga suspek ang 30 transparent vacuum sealed plastic bags, isang Black Toyota Fortuner (NBV 6967) at susi nito, isang (1) cellphone, passport, driver’s license, dalang (2) wallet at Php1,000 bill bilang buy-bust money.
Nahaharap ang mga suspek sa kasong paglabag sa Section 5 and 11 ng Republic Act 9165 o ang “Comprehensive Dangerous Drugs Act of 2002”.
Ang matagumpay na operasyon ay bunga ng pagtutulungan ng iba’t ibang ahensya at ng kapulisan upang sugpuin ang pagpapalaganap ng ilegal na droga at ang mga sangkot sa pagbebenta at paggamit nito.
Tinitiyak ni PBGen Fajardo na magpapatuloy ang maigting na kampanya laban sa ilegal na droga upang mapanatili ang kapayapaan at kaayusan sa komunidad, bilang bahagi ng hangaring makamit ang isang Bagong Pilipinas.
Panulat ni Pat Pearl Crystalynne Javier
