Nanindigan ang Philippine National Police (PNP) sa mahigpit na pagsunod sa mandato ng Konstitusyon ukol sa pagiging non-partisan at apolitical upang protektahan ang proseso ng halalan.
Ang pagtalima ng mga pulis na manatiling neutral mula noong kampanya, araw ng halalan hanggang sa post-election duties ay nagpapahiwatig ng kanilang mataas na antas ng propesyonalismo at disiplina sa pagsunod sa malinaw na direktiba ni PNP Chief, Police General Rommel Francisco D. Marbil.
Mahigpit niyang pinaalalahanan ang kapulisan sa kanilang tungkuling protektahan ang proseso ng halalan—hindi ang impluwensyahan ito.
Ayon kay PGen Marbil, walang naiulat na insidente ng partisanship o political bias sa katatapos na eleksyon.
“Ikinagagalak kong ipahayag sa buong bansa, na ang ating mga PNP personnel ay nanatiling tapat sa kanilang sinumpaang tungkulin at sa aking direktiba na manatiling apolitical. Walang sino man ang nasangkot sa anumang political activity. Ginampanan nila ang kanilang tungkulin nang may dangal, propesyonalismo, at pagiging patas. Isa itong malinaw na patunay na ang PNP ay isang matured na institusyon na kayang gampanan ang papel nito sa demokrasya nang walang kinikilingan,” sabi ni CPNP.
Dagdag pa niya, hindi daw politika kundi tunay na serbisyo politiko ang isinaalang-alang ng kapulisan.
