Sa isang pahayag ni Police Colonel Randulf Tuaño, Chief, PIO, sinabi nitong nasa Heightened Alert Status na ang PNP na dating nasa Full Alert Status dahil sa halalan. Aniya, maaring nang bumalik sa normal na duty ang mga pulis na nakadeploy para sa election duty. Mananatili na lamang ang ibang pulis sa ilang lugar na hindi pa tapos ang bilangan ng boto sa nasabing eleksyon.
Dagdag pa ni PCol Tuaño na nasa ibang mga Regional Director na ang pagpapasya sa magiging alert status ng kanilang mga AOR. Aniya, tanging ang National Capital Region Police Office ang nananatili sa Full Alert Status dahil sa may ilang lugar pa rito na hindi pa natatapos ang proklamasyon.
Kasalukuyan namang nagpapatuloy ang post-assessment ng PNP sa halalan upang paghandaan ang darating na eleksyon sa BARMM sa October.
Samantala nagpasalamat naman ang PNP hindi lamang sa lahat ng mga ahensya ng pamahalaan kundi sa publiko na nakiisa sa pagpapanatili ng kaayusan at kapayapaan sa panahon ng halalan. Dahil sa naturang kooperasyon nagkaroon ng malaking pagbaba ng election-related incidents (ERI) nitong taon, kung saan nakapagtala lamang ng 49 validated ERI o katumbas ng 53%, di hamak na mas mababa sa 105 na naitala noong 2023 Barangay Sangguniang Kabataang Elections.
