Arestado ang isang lalaking kabilang sa listahan ng mga Regional Most Wanted Person ng Police Regional Office 5 matapos ang matagumpay na operasyon na isinagawa ng mga awtoridad bandang alas 12:50 ng hapon, Mayo 11, 2025, sa Barangay Taisan, Bula, Camarines Sur.
Ang operasyon ay pinangunahan ng Criminal Investigation and Detection Group Camarines Sur Provincial Field Unit, katuwang ang Bula Municipal Police Station.
Matagumpay na naaresto ang suspek sa bisa ng Warrant of Arrest sa kasong Rape at paglabag sa Republic Act 7610 o ang “Special Protection of Children Against Abuse, Exploitation and Discrimination Act”.
Ang operasyon ay bahagi ng pinaigting na kampanya ng PNP laban sa mga indibidwal na may kinakaharap na mabibigat na kaso at matagal nang nakatakas sa kamay ng batas.
Patuloy na nananawagan ang PRO5 sa publiko na makipagtulungan at magsumbong ng impormasyon upang mahuli pa ang iba pang wanted persons sa rehiyon.
