Davao City – Tinatayang kalahating milyong pisong halaga ng shabu ang nakumpiska ng mga operatiba ng Davao City sa isang babae sa buy-bust operation nitong Miyerkules, Marso 2, 2022.
Kinilala ni PMaj Noel Villahermosa, Station Commander, Police Station 3-Talomo ang suspek na si Roselyn Solis, 33, alyas “Megs” na residente ng siyudad.
Ayon kay PMaj Villahermosa, nahuli ang suspek sa Km. 8.5 Matina Pangi City, Davao City ng Police Station 3-Talomo Drug Enforcement Unit sa aktong pagbebenta ng shabu.
Ayon pa kay PMaj Villahermosa, nakuha mula sa suspek ang mga sachet ng hinihinalang shabu na may tinatayang timbang na 30 gramo na nagkakahalaga ng Php500,000, buy-bust money, at iba pang non-drug at personal items.
Ang suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
Hinihikayat din ni PMaj Villahermosa ang publiko na makipagtulungan sa kanilang kampanya kontra ilegal na droga sa pamamagitan ng pagbibigay ng mahahalagang impormasyon sa ating kapulisan kaugnay sa mga ilegal na aktibidad sa kanilang komunidad.
Dagdag pa niya, hindi magsasawa ang PNP na supilin at panagutin lahat ng mga konektado sa ilegal na droga.
####
Panulat ni Police Corporal Mary Metche Moraera
