Natigil ang botohan sa presinto ng Barangay West Marinaut nang buhusan ng tubig ng isang poll watcher ang Automated Counting Machine (ACM) kaninang 7:00 ng umaga, Mayo 12, sa Sagonsongan West Marinaut, Marawi City.
Ayon kay Police Colonel Robert S Daculan, agarang pagrisponde ang isinagawa ng Marawi City PNP sa naturang lugar ngunit hindi na nila naabutan ang poll watcher. Agad namang pinalitan ang nasirang ACM.
Dagdag ng technician ng COMELEC na nagbabantay sa presinto, nasira ng tubig ang ACM kaya pansamantalang natigil ang botohan.
Kasalukuyan namang pinaghahanap ng ating kapulisan ang isang babaeng poll watcher sa isang polling precinct sa West Marinaut, Marawi City upang mapanagot sa pagkasira ng isang Automated Counting Machine at pagpanandaliang pagkahinto ng botohan.
