Arestado ang pitong (7) miyembro ng armadong grupo na sangkot sa engkwentro sa Barangay Kabuling, Pandag, Maguindanao del Sur, Sabado ng hapon, ika-10 ng Mayo 2025.
Kinilala ni Police Brigadier General Romeo Juan Macapaz, Regional Director ng Police Regional Office Bangsamoro Autonomous Region, ang isa sa mga nasawi na si Emran Tumbah Mamalinta, isang kandidato sa pagka-konsehal, at si Alkama Kilam Maslama, isang estudyante na nadamay sa putukan.
Ayon sa ulat, parehong nasawi ang dalawa matapos tamaan ng bala sa gitna ng sagupaan ng mga grupong umano’y may kaugnayan sa magkalabang lokal na politiko.
Sa pamamagitan ng pinagsanib na pwersa ng Maguindanao del Sur Provincial Police Office at 2nd Mechanized Infantry Battalion ng Philippine Army, matagumpay na naaresto ang pitong (7) miyembro ng armadong grupo.
Narekober mula sa mga suspek ang matataas na uri ng armas kabilang ang tatlong (3) M16 rifles, dalawang (2) .30 caliber M1 Garand rifles, isang (1) M653 rifle, at isang (1) M203 rifle na may kasamang 40mm grenade launcher.
Ayon sa mga otoridad, napilitang sumuko ang mga suspek nang matukoy nilang sila ay napapalibutan na ng mga rumespondeng tropa. Samantala, ilan pang kasamahan ng grupo ang nakatakas patungong karatig-barangay bitbit ang iba pang mga armas.
Nadamay rin sa insidente ang isang matandang Moro na tinamaan ng ligaw na bala at agad na isinugod sa pagamutan ng mga emergency responders.
Patuloy ang masusing imbestigasyon ng Pandag Municipal Police Station katuwang ang Maguindanao Police Provincial Office upang matukoy ang iba pang mga sangkot sa naturang karahasan at upang matiyak ang kapayapaan at seguridad ng mga mamamayan sa lugar.
