Nagsagawa ng press briefing ang Police Regional Office 3 kaugnay ng mga paghahanda para sa nalalapit na 2025 Midterm Elections sa Patrol Hall ng PRO 3 Multi-Purpose Building sa Camp Olivas, City of San Fernando, Pampanga nito lamang Huwebes ika-8 ng May, 2025.
Pinangunahan ito ni Police Brigadier General Jean S Fajardo, Regional Director ng PRO 3, na dinaluhan ni Atty. Elmo T. Duque, Assistant Regional Election Director ng COMELEC Region 3 at mga miyembro ng media.
Ibinahagi ang activation ng Media Action Center at Regional Election Monitoring Action Center o REMAC, na magsisilbing tulay sa koordinasyon ng media, kapulisan, at iba pang stakeholders upang masiguro ang maayos at ligtas na halalan.
Ibinahagi ni PBGen Fajardo ang mga naging paghahanda ng kapulisan para sa seguridad at pagtutok sa mga election hotspot.
Kasunod nito ay isinagawa ang isang Simulation Exercise na tampok ang paggamit ng 911 emergency hotline na bukas 24/7 upang masiguro ang mabilis na pagresponde sa anumang insidente.
Ipinakita rin ang mga itinalagang monitoring teams mula sa bawat City at Provincial Police Office na bahagi ng REMAC, na siyang naatasan na mag-uulat ng mga election-related activities at insidente sa kani-kanilang nasasakupan.
Ang naturang aktibidad ay isang positibong hakbang mula sa PRO 3 na nagpapakita ng kanilang aktibong pakikipag-ugnayan sa COMELEC upang matiyak ang isang mapayapa, maayos, at tapat na halalan sa rehiyon ng Gitnang Luzon.
Panulat ni Pat Pearl Crystalynne Javier
