Inalis sa pwesto ang 15 tauhan ng Valenzuela City Police Station matapos masangkot sa umano’y extortion activity, kabilang na ang tatlong aktibong imbestigador na naaresto sa isang entrapment operation na isinagawa sa Barangay Malinta, Valenzuela City dakong 8:00 ng gabi nito lamang Huwebes, Mayo 8, 2025.
Kabilang sa mga inalis sa puwesto ay ang dalawang unit chief at 13 Police Non-Commissioned Officers (PNCOs) bilang agarang hakbang sa administratibo habang isinasagawa ang malalim na imbestigasyon sa insidente.
Ayon kay Police Colonel Nixon Cayaban, Hepe ng Valenzuela City Police Station, hindi kinukunsinti ng kanilang hanay ang anumang uri ng katiwalian.
Isinailalim na sa masusing investigation and summary proceedings ang mga sangkot habang pansamantalang inilipat sa Regional Personnel Holding and Accounting Unit (RPHAU) ng NCRPO.
Tiniyak ng Valenzuela City Police Station na mananatiling bukas sa publiko ang kanilang tanggapan para sa anumang sumbong o reklamo, at naninindigan silang paiiralin ang transparency, accountability, at integridad sa serbisyo.
“Hindi natin kailanman papayagan ang ganitong gawain sa ating organisasyon. Ang mas masakit pa, ang mga sangkot ay yaong mismong may tungkuling magpanatili ng katarungan,” ani PCol Cayaban.
