Nasabat ang tinatayang Php238,000 halaga ng shabu mula sa isang 34-anyos na lalaki sa ikinasang buy-bust operation ng mga operatiba ng District Drug Enforcement Unit (DDEU) ng Northern Police District (NPD) sa kahabaan ng Industria Street, Barangay Tugatog, Malabon City bandang 7:19 ng umaga nito lamang Biyernes, Mayo 2, 2025.
Ang operasyon ay pinangunahan ni Police Major Jeraldson L. Rivera ng NPD-DDEU, katuwang ang Substation 2 ng Malabon City Police Station, sa wastong koordinasyon ng Philippine Drug Enforcement Agency (PDEA).
Naaresto ang suspek matapos tanggapin ang marked money mula sa poseur-buyer kapalit ng hinihinalang shabu.
Nakumpiska mula sa suspek ang tinatayang 35 gramo ng hinihinalang shabu na may Standard Drug Price na humigit-kumulang Php238,000 at iba pang non-drug evidence.
Nahaharap ang suspek sa kasong paglabag sa Seksyon 5 at 11 ng Article II ng Republic Act 9165 o “Comprehensive Dangerous Drugs Act of 2002”.
Pinuri ni Police Brigadier General Josefino D. Ligan, ang mabilis at maayos na aksyon ng mga operatiba, kasabay ng pagbibigay-diin sa patuloy na pagpapatupad ng “AAA Strategy” ng NCRPO—Able, Active, at Allied—na layuning labanan ang krimen at iligal na droga sa buong Metro Manila sa pamumuno ni PMGen Anthony A. Aberin, Regional Director ng NCRPO.
Source: NPD PIO
Panulat ni PMSg Remelin M Gargantos
