Nakapagtala ng pagbaba ng crime rate na 27.54% percent ang Police Regional Office (PRO) 7 mula January 1 hanggang April 25 ngayong taon, kumpara sa parehong mga buwan sa taong 2024.
Ayon kay PRO 7 Regional Director, Police Brigadier General Redrico Maranan, nakapagtala sila ng kabuuang 742 kaso ng index crime sa rehiyon, mas mababa ng 282 sa 1,024 na naitala noong nakaraang taon.
Kabilang sa index crimes ang mga krimeng gaya ng murder, homicide, physical injury at rape, at ang mga kaso ng robbery, theft, car at motorcycle theft.
Dagdag pa ni PBGen Maranan, na ang mga bahagdang ito ay maiuugnay sa tuloy-tuloy na pagpapaigting ng PRO 7 sa mga kampanya nito laban sa illegal firearms at organized crime, alinsunod sa direktiba ni Philippine National Police (PNP) Chief, General Rommel Francisco Marbil, lalo na sa panahon ng Eleksyon 2025.
Sa kabilang banda, nasakote naman ng Criminal Investigation and Detection Group (CIDG) ang isang gun-running syndicate sa lalawigan ng Cebu.
Ayon kay CIDG Director, Police Major General Nicolas Torre III, naaresto ng mga operatiba ang tatlong miyembro ng Ocariza Criminal Group, na sangkot umano sa mga gun-for-hire and gun-running activities sa Cebu City at sa mga kalapit nitong lungsod at munisipalidad.
Kinilala ang mga naaresto na sina Jimboy, Rowel, at Andrio na nahuling nagbebenta ng mga “loose firearms” sa kabila ng kasagsagan ng election gun ban.
Samantala, sinabi naman ni PBGen Maranan na ang naturang matagumpay na kampanya ng CIDG ay naisakatuparan sa pamamagitan ng pakikipagtulugan ng iba’t ibang local government units at ng Commission on Elections, bukod pa dito ang masusing pagpapatupad ng mga intelligence-driven operations ng Pambansang Pulisya.
