Umabot sa 12,849 pulis na ang bumoto matapos ang dalawang araw ng Local Absentee Voting (LAV).
Ayon kay PNP Information Chief, Polonel Colonel Randulf Tuaño sa press conference nitong ika-29 ng Abril sa Kampo Krame, kabuuang 11,891 pulis na nakatalaga sa Regional Police Offices (PROs) at 958 naman na nakatalaga sa National Headquarters sa Camp Crame ang nakaboto na sa 2025 LAV.
Aniya, “As of this report, sa National Headquarters po ang nakaboto na out of 1,471 ay 958 or 61.52%, at para naman sa records natin sa Police Regional Offices, out of the 19,752, ang nakaboto na po ay 11,891 o 60.20%.”
Sa 24,848 PNP personnel na naka-avail ng LAV, ang inaprubahan lamang ng Commission on Elections ay 21,223 para boboto sa tatlong araw na itinakdang botohan (April 28-30, 2025). Umaasa ang PNP na ang natitirang 8,374 na pulis ay makaboboto sa huling araw ng LAV.
Ang tatlong araw na Local Absentee Voting ay nagbibigay-daan sa mga pulis, sundalo, manggagawa sa media, at iba pang frontliners ng gobyerno na may itinalagang mga tungkulin sa araw ng halalan na bumoto nang maaga.
Samantala, nakapagtala ang PNP ng 35 validated Election-Related Incidents (ERIs), dalawang linggo bago ang halalan, na naganap sa Cordillera Administrative Region (11); Bangsamoro Administrative Region in Muslim Mindanao (8); CALABARZON (5); Zamboanga Peninsula (3); Kanlurang Visayas (2); Davao Region (2), Ilocos Region (1), Central Luzon (1), Eastern Visayas (1) at Soccsksargen (1).
Patuloy pa rin ang ginagawang hakbang ng kapulisan upang tiyakin ang isang payapa at maayos na halalan.
