Sinimulan na ngayong araw ng Philippine National Police ang Local Absentee Voting para sa 2025 Local and National Elections na ginanap sa Multi-Purpose Center, Camp BGen Rafael T Crame, Quezon City.
Sa nalalabing dalawang linggo bago ang halalan, mismong si PNP Chief, Police General Rommel Francisco D. Marbil, ang nanguna sa pagbubukas ng LAV sa pamamagitan ng kanyang maagang pagboto ngayong umaga, na nagsilbing inspirasyon sa lahat ng PNP personnel.
Mula sa humigit kumulang na 33,000 na PNP personnel sa buong bansa na nagpahayag ng kanilang intensyon na mag-avail ng Local Absentee Voting (LAV), 1,471 Crame-based personnel ang nagpahayag ng kanilang kagustuhang gamitin ang kanilang karapatan na bumoto kasabay ng kanilang paghahanda para sa election duties sa buong bansa.
Sa kanyang mensahe, binigyang-diin ni PGen Marbil ang kahalagahan ng pagboto, lalo na sa mga tagapagpatupad ng batas. “Hindi lang tayo tagapagtanggol ng demokrasya — bahagi rin tayo ng demokrasya,” ani CPNP. “Ang pagboto ay hindi lang karapatan, kundi tungkulin natin. Isa itong paraan para ipakita ang pagmamahal natin sa bayan.” Tiniyak din ni Chief PNP Marbil sa publiko na handang-handa na ang PNP na siguraduhin ang kaligtasan ng nalalapit na halalan, sa tulong ng kanilang mga tauhan, mobility assets, at logistical resources.
Pinaalalahanan niya ang lahat na manatiling mapagmatyag at propesyonal sa harap ng mga posibleng banta sa integridad at seguridad ng eleksyon.
Magpapatuloy ang Local Absentee Voting hanggang April 30, 2025, kung saan pinapayagan ang mga pulis, sundalo, media workers, at iba pang frontline government workers na makaboto nang mas maaga para matiyak ang kanilang partisipasyon sa demokratikong proseso.
Muling pinagtitibay ng PNP ang kanilang dedikasyon sa pagbabantay sa boses ng bayan at sa pagpapatibay ng demokrasya habang papalapit ang araw ng halalan.
(PNP-PIO)
