Nagbabala ang Philippine National Police – Supervisory Office for Security and Investigation Agencies (PNP-SOSIA) laban sa mga nagpapanggap na pulis at nanghihingi ng pera o donasyon sa mga private security industry stakeholders.
Ayon sa PNP-SOSIA, nakatanggap sila ng mga ulat na may mga taong tumatawag o nakikipag-ugnayan sa mga security agency para humingi ng donasyon, pera man o “in kind” gamit ang pangalan ng PNP.
Nilinaw naman ng SOSIA na hindi sila nagsasagawa o nagpapahintulot ng anumang uri ng solicitation.
Malinaw din na iligal ang ganitong gawain na sumisira sa imahe ng Pambansang Pulisya. Kaya naman, hinihikayat ng PNP-SOSIA ang lahat ng stakeholders sa private security industry na huwag magbigay ng anuman sa mga nagpapanggap na kinatawan ng PNP.
Sa halip, isumbong sa pinakamalapit na himpilan ng pulisya para sa kaukulang aksyon.
Determinado ang ating kapulisan na babantayan at susugpuin ang ganitong klaseng mga gawain na nagdudulot ng takot at kalituhan sa publiko.
