Nakumpiska ang tinatayang Php6,303,000 halaga ng puslit na sigarilyo mula sa isang motorized banca sa ikinasang seaborne patrol operation ng PNP Maritime Group sa karagatang bahagi ng Tambunan, Tabina, Zamboanga del Sur dakong 2:35 ng madaling araw ng Abril 19, 2025.
Nabatid na sakay ng naturang motorized banca ang anim na indibidwal na sangkot sa pagpupuslit ng yosi.
Nakumpiska sa operasyon ang 110 master cases ng Fort brand smuggled cigarettes na may tinatayang halaga na Php6,303,000.
Bukod dito, nakumpiska rin ang isang motorized banca na nagkakahalaga ng Php120,000 at isang Mitsubishi engine na tinatayang nasa Php100,000, na may kabuuang halaga ng mga nasabat na kontrabando na umaabot sa Php6,523,000.
Samantala, pinuri ni Police General Rommel Francisco D Marbil, Chief, PNP, ang PNP Maritime Group sa matagumpay na anti-smuggling operation.
“Sa atas ni Pangulong Ferdinand R. Marcos Jr. patuloy ang pinaigting na kampanya ng PNP laban sa smuggling. Hindi lang ito basta paghuli ng smugglers-ito ay tungkol sa pagprotekta ng ating mga karagatan at siguraduhing ligtas ang ating mga kababayan, lalo na’t papalapit na ang 2025 Elections,” pahayag ni CPNP Marbil.
Nanawagan naman ang PNP sa publiko na maging mapagmatyag at agad na iulat sa mga awtoridad ang anumang kahina-hinalang aktibidad, lalo na sa mga coastal communities. Ang laban kontra smuggling ay hindi lamang laban ng kapulisan, kundi responsibilidad ng bawat mamamayan.
Source: PNP FB Page
