Arestado ang tatlong indibidwal na sangkot sa ilegal na droga sa isinagawang buy-bust operation ng District Drug Enforcement Unit ng Northern Police District (DDEU-NPD) nito lamang Sabado, Abril 12, 2025, sa East Riverside, Barangay Potrero, Malabon City.
Kinilala ni Police Brigadier General Josefino Ligan, District Director ng Northern Police District, ang mga suspek na sina alyas na “Dondon,” 42 anyos, construction worker; “Judith,” 42 anyos, walang trabaho; at “Macmac,” 24 anyos, walang trabaho—lahat ay residente ng Caloocan City.
Sina “Dondon” at “Judith” ay kapwa nakatala bilang mga High Value Individuals (HVI) at kilalang miyembro ng Jojo Balaoro Drug Group, habang si “Macmac” ay isang Street Level Individual (SLI).
Nakumpiska mula sa mga suspek ang tinatayang 30 gramo ng hinihinalang shabu na may Standard Drug Price (SDP) na humigit-kumulang Php204,000, isang kalibre .38 revolver na kargado ng dalawang bala.
Kasong paglabag sa Section 5 (Sale) kaugnay ng Section 26 (Conspiracy) at Section 11 (Possession of Dangerous Drugs) ng Article II ng Republic Act 9165 (Comprehensive Dangerous Drugs Act of 2002), at Section 28 ng R.A. 10591 (Comprehensive Firearms and Ammunition Regulation Act) kaugnay ng B.P. 881 (Omnibus Election Code) ang kakaharapin ng mga suspek.
“Mananatiling masigasig ang Northern Police District sa pagsugpo sa ilegal na droga. Patuloy tayong makikipagtulungan sa mga katuwang na ahensya at komunidad upang makamit ang isang ligtas at drug-free na pamayanan,” pahayag ni PBGen Ligan.
Source: NPD PIO
Panulat ni PMSg Remelin M Gargantos
