Nasabat ang tinatayang Php2,046,392 halaga ng hinihinalang shabu mula sa tatlong Hign Value Individual at isang menor-de-edad sa ikinasang operasyon ng mga awtoridad sa Rosary Heights 5, Cotabato City, Maguindanao del Norte nito lamang ika-13 ng Abril 2025.
Kinilala ni Police Lieutenant Colonel Esmael A Madin, Chief of Police ng Sultan Kudarat Municipal Police Station, ang mga naarestong suspek na sina alyas “James”, 31 anyos, “Arman”, 35 anyos, “Jel”, 21 anyos, at “Akmad”, menor-de-edad, pawang mga residente ng nasabing lungsod.
Naging matagumpay ang naturang operasyon sa pinagsanib na pwersa ng mga tauhan ng Sultan Kudarat MPS katuwang ang Cotabato City PNP, Maguindanao del Norte PNP, na nagresulta sa pagkakaaresto ng mga suspek at pagkakakumpiska ng anim na piraso ng heat-sealed plastic sachets na hinihinalang shabu na tumitimbang ng humigit-kumulang 300 gramo at may tinatayang halaga na Php2,046,392, apat na bundle ng Php1,000 boodle money, iba’t ibang non-drug evidence tulad ng mga plastic bag, cellphone, shipment form, at isang puting minivan.
Ang mga suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Samantala, ang menor-de-edad ay itinurn-over sa tanggapan ng Ministry of Social Services and Development para sa nararapat na pangangalaga.
Patuloy ang maigting na kampanya ng Maguindanao del Norte PNP laban sa iligal na droga, sa pangunguna ni Police Brigadier General Romeo Juan Macapaz, Regional Director ng PRO BAR, bilang suporta sa programang Buhay Ingatan, Droga’y Ayawan ng DILG at sa direktiba ng pambansang pamahalaan sa ilalim ng Bagong Pilipinas.
Panulat ni Patrolwoman Ma. Señora Agbuya
