Dalawang itinuturing na High Value Individual (HVI) ang naaresto sa isang matagumpay na operasyon matapos mahulihan ng Php1.3 milyong halaga ng iligal na droga sa Zone 6, Barangay Calumpang, Molo, Iloilo City nitong ika-7 ng Abril, 2025.
Kinilala ang dalawang HVI na maglive-in na sina alyas “Jeff”, 24 anyos, walang trabaho, at residente ng Project 5, Barangay So-oc, Arevalo, Iloilo City, at alyas “Miah”, 20 anyos, walang trabaho, at residente ng Zone 6, Barangay Calumpang, Molo, Iloilo City.
Nakumpiska mula sa mga suspek ang humigit-kumulang 200 gramo ng hinihinalang shabu na may tinatayang Standard Drug Price na Php1,360,000.
Sila ay matagal nang minamanmanan ng mga kapulisan dahil sa kanilang pagkakasangkot umano sa kalakaran ng iligal na droga sa lungsod.
Pinangunahan nina Police Captain Ryan Christ C Inot, Officer-in-Charge ng City Drug Enforcement Unit (CDEU), at PLt Joelie John M Bandojo, Team Leader, ang ikinasang buy-bust operation kasama ang mga operatiba mula sa RPDEU 6 at ICPS 4 Station Drug Enforcement Team (SDET).
Ang mga suspek ay kasalukuyang nasa kustodiya ng Iloilo City Police Station 4 (ICPS4) para sa wastong dokumentasyon at paghahanda sa pagsasampa ng kaso.
Ang matagumpay na operasyon ay patunay ng walang humpay na kampanya ng Philippine National Police laban sa ipinagbabawal na droga at sa kanilang dedikasyon sa pagpapanatili ng kaayusan at kaligtasan ng publiko, dahil sa Bagong Pilipinas ang gusto ng Pulis Ligtas ka!.
Source: PRO6 RPIO
Panulat ni Pat Justine Mae Jallores
