Nasamsam ng mga tauhan ng Bulacan PNP ang Php238,000 halaga ng hinihinalang shabu mula sa tatlong suspek matapos ang matagumpay na buy-bust operation sa Barangay San Pedro, City of San Jose Del Monte, Bulacan nito lamang Sabado ika- 15 ng Marso 2025.
Kinilala ni Police Lieutenant Colonel Edilmar G Alviar, Acting Chief of Police ng San Jose Del Monte City Police Station, ang mga suspek na dalawang lalaki at isang babae.
Ayon kay Alviar, naaresto ang mga suspek sa ikinasang operasyon ng Intelligence at Special Drug Enforcement Unit (SDEU) ng San Jose Del Monte City Police Station.
Nasamsam mula sa mga suspek ang humigit kumulang 35 gramo ng hinihinalang shabu na may Standard Drug Price na Php238,000 at iba pang non-drug items.
Mahaharap ang mga suspek sa kasong paglabag sa Section 5 at Section 11 ng Republic Act 9165, o ang “Comprehensive Dangerous Drugs Act of 2002”.
Patuloy na pinalalakas ng Pambansang Pulisya ng Pilipinas ang kampanya laban sa ilegal na droga upang matiyak ang kaligtasan at seguridad ng mamamayan, tungo sa isang mas ligtas at drug-free na lipunan para sa lahat.
Panulat ni Pat Mildred A Tawagon
